மைசூரு தசரா பூஜையில் தலித் அமைச்சர்களுக்கு அனுமதி மறுப்பா? விசாரணைக்கு உத்தரவிட்டார் டி.கே. சிவகுமார்! மூன்று தலித் அமைச்சர்கள் தடுத்து நிறுத்தப்பட்டதாகப் புகார் – அதிகாரிகள் மீது நடவடிக்கை எடுக்கப்படுமா?

செய்தி: ஆர். செல்வராஜ்
மைசூரு, அக். 24:
கர்நாடக மாநிலம் மைசூருவில் தசரா விழாவையொட்டி நடைபெற்ற பாரம்பரிய நந்தி துவஜ பூஜையில், மூன்று தலித் அமைச்சர்கள் தடுத்து நிறுத்தப்பட்ட சம்பவம் சர்ச்சையை ஏற்படுத்தியுள்ளது.

இதுகுறித்து விசாரணை நடத்த கர்நாடக முதலமைச்சர் டி.கே. சிவகுமார் உத்தரவிட்டுள்ளார்.

மைசூரு அரண்மனை வளாகத்தில் அக்டோபர் 21ஆம் தேதி நடைபெற்ற நந்தி துவஜ பூஜை நிகழ்ச்சியில் பங்கேற்பதற்காக முதலமைச்சர் டி.கே. சிவகுமார் சென்றார்.

அவருடன் அமைச்சர்களான சிவராஜ் தங்கடகி, பி.எம். நரேந்திர சுவாமி, கே.எஸ். பசவராஜு உள்ளிட்டோரும் சென்றிருந்தனர்.

அப்போது பூஜை நடைபெறும் இடத்திற்குள் செல்ல முயன்ற அமைச்சர்களை, மைசூரு காவல் கண்காணிப்பாளர் சி.பி. ரிஷ்யந்த் தடுத்து நிறுத்தியதாகத் தகவல்கள் தெரிவிக்கின்றன.

இதனால் அங்கு வாக்குவாதம் ஏற்பட்டது.

அமைச்சர்கள் தடுத்து நிறுத்தப்பட்ட விவகாரம் பரபரப்பை ஏற்படுத்திய நிலையில், முதலமைச்சர் டி.கேh சிவகுமார் நேரடியாகத் தலையிட்டு அவர்களை உள்ளே அனுமதிக்குமாறு அதிகாரிகளிடம் அறிவுறுத்தினார்.

இதையடுத்து அவர்கள் பூஜையில் பங்கேற்க அனுமதிக்கப்பட்டனர்.

விசாரணைக்கு முதலமைச்சர் உத்தரவு!

இந்தச் சம்பவத்தைத் தொடர்ந்து, அதிகாரிகளின் செயல்பாடுகள் குறித்து விசாரணை நடத்த தலைமைச் செயலாளர் ஷாலினி ரஜனீஷுக்கு முதலமைச்சர் உத்தரவிட்டுள்ளார்.

விசாரணை அறிக்கை கிடைத்த பிறகு, தவறு செய்திருப்பது உறுதி செய்யப்படும் அதிகாரிகள் மீது உரிய நடவடிக்கை எடுக்கப்படும் என்றும் தெரிவிக்கப்பட்டுள்ளது.

அமைச்சர்களைத் தடுத்து நிறுத்தியதற்கான காரணம் என்ன, பாதுகாப்பு நடைமுறைகள் முறையாகப் பின்பற்றப்பட்டனவா, அதிகாரிகளின் செயல்பாட்டில் தவறு இருந்ததா என்பன உள்ளிட்ட விவரங்கள் விசாரணையின் மூலம் தெரியவரும் என எதிர்பார்க்கப்படுகிறது.

சமூக நீதி குறித்தும் கேள்விகள்!

இந்தச் சம்பவத்தைத் தொடர்ந்து, அமைச்சர்கள் தடுத்து நிறுத்தப்பட்டதற்குப் பின்னால் சாதி அடிப்படையிலான பாகுபாடு இருந்ததா என்ற கேள்வியையும் எதிர்க்கட்சியினர் எழுப்பியுள்ளனர்.

அதேநேரத்தில், பாதுகாப்பு நடைமுறைகள் தொடர்பான விவரங்கள் முழுமையாக வெளிவருவதற்கு முன்பே காரணத்தை முடிவு செய்யக் கூடாது என்ற கருத்தும் முன்வைக்கப்பட்டுள்ளது.

அமைச்சர்களுக்கே இதுபோன்ற நிலை ஏற்பட்டதாகக் கூறப்படும் சூழலில், அரசு நிகழ்ச்சிகளில் மக்கள் பிரதிநிதிகளுக்கு உரிய மரியாதை வழங்கப்படுவதையும், பாதுகாப்பு நடைமுறைகள் பாரபட்சமின்றிப் பின்பற்றப்படுவதையும் உறுதி செய்ய வேண்டிய பொறுப்பு அதிகாரிகளுக்கு உள்ளது.

விசாரணை அறிக்கையில் உண்மைகள் வெளிவருவதுடன், தவறு நடந்திருந்தால் சம்பந்தப்பட்டவர்கள் மீது நடவடிக்கை எடுக்கப்படுமா என்பதே தற்போது எழுந்துள்ள முக்கியக் கேள்வியாக உள்ளது.